Pech in de optoch maar toch oppe Ruiver aangekomme.

Nao maonde intensief zeuke nao ein bouwplaats is 't den toch gelok om os aaje plaats truuk te kriege. Door bemiddelinge van Geert Teunissen (HKB) en Koos Teunissen (Litax) kreege veur de gelaegeheid om weer te gaon bouwe. Ut waas al laat in ut jaor en d’r mos nog hiel get gebeure. Ut idee waas al sjnel gebaore en de maquette waas al door Michel gemaak. Jong wat ein gevaarte dao loog ein oetdaaging. Ieverig waerde de hendjes oet de mouwe gesjtaoke en der taege aan gegaon. Nao waeke zaage, naegele, lieme en sjildere waerde ózze wage omgetoverd in ein heus Café restaurant Hotel. In dit zellefde Vastelaoves seizoen kwaam nog ein geweldige verrassing, de dochter Sandy van ózze veurzitter Michel waerde de 1^e Prinses van de Windjbuujels en det sjloog in wie ein bom. Wat waas det geweldig Michel en Willy zoe trots wie eine pauw en Sandy I sjtraolde wie ein Sterke. De Vastelaovend naderde en de wage waas bienao klaor. Gelökkig hóbbe veur nog hulp gekrege van ein paar fanatieke miense (René en Anouk Bedank) om os te helpe zodat de wage oppe tied aaf waas.

Zaoterdig de 17^e waas ut den zover. De wage mos nao boete om aaf te bouwe want ut daak kós der binne neet op, dao waas de loods neet hoeëg genóg veur. De waergoode ware os good gezind en ónger de staole van ein lekker zunke waerde boete ut daak op ut Hotel aafgemaak. Alles leep op sjema en ut letste waerde  Jodellei op ut daak geplaats en dao mós eine kraan biej te pas komme, gelökkig waerde det geregeld door de hulp van de vlieger Transport (Freek bedank) en waerde Jodellei precies op ut daak geplaats.

Maondig de 19^e waas ut den zowiet. S’morges waerde nog efkes de puntjes oppe i gezatte en alles klaor gemaak veur de optoch. Om óngevieër ein oer gierde de kriebels en adreliene weer biej idderein door ut lief, dao ginge veur op waeg nao de opsjtelplaats. Ongerwaeg krege veur al de nuuëdige aandag en waerde oetbundig nao os gesjweid en ginge de doeëme ómhoeëg, det waas kikke en ut kós noe al neet mier kepot.

Ózze wage waerde opgesjteld veur de deur van Pieter van sjlechter om zoe in de optoch aan te sjloete as os nummer veurbiej kwaam. Vakkundig waerde der weer plaats gemaak om in de optoch aan te sjloete maar….. det ging neet zoe as veur hadde gedach. Veur krege de motor neet gestart, met gen meugelikheid sjpróng dae aan en os zakte de mood nog lieger as de sjoon. Dit ken toch neet maonde gebouwd zjweit en traone gelaote en noe dit. Der waerde van alle kante hulp gebaoje zellef leje van de Raod krope ónger de wage om te kieke woe ut probleem zoot. Miense det waas neet te besjrieve wat dao door os haer ging. De motor waerde vriej gemaak en alles waerde geprobeerd neet te gluive net leep der nog, doe kós aan de miense die zich rondjom de wage hadde verzameld gewoen veule wie die met os met laefde. De optoch waas zoget veurbiej en de jónges van de Raod maakte aansjtalte om ózze wage achter dae van Hoeëgheid Pieter II vas te make om zoe toch in dae optoch met te gaon, maar det waas veur os gen optie. ( Jonges toch bedank) Op det moment waerde eine flinke slaag op de motor gemep en…… neet te gluive hé sjtarde as of der nieks aan de handj waas. Veur koste ut waal oetsjriewe van bliedsjap en de miense om os haer begoste sjpontaan te klappe. De prinsewage waas al ein paar hongerd maeter euver de Keulsewaeg aan ut trekke wie veur de Keulsewaeg op trokke en wat veur dao zogen waas neet te besjrieve, de miense bleve sjtaon wachte man wat waas det sjiek. Veur sjloete sjnel aan achter de Prinsewage aan en toen had Prins Pieter II ut aug in de gate hae zweijde oetbundig en waas bliej det veur toch nog koste aansjloete. Ut vuurke ging sjnel rondj det veur pech hadde maar nemus had gedacht det veur achter de Prinsewage zouwe trekke. Vanaaf det moment waas ut allein maar geneete. Oppe Ruiver aangekomme krege veur weer de sjrik, net biej ut Luxor woe veur efkes sjtil móste sjtaon sjloog de motor aaf en waas ut gans gedaon. Veur waerde met de traktor verder gertokke toet oppe mert en daoveur danke veur dae miens noe nog det we toch de mert hóbbe gehaold. Ut waas duudelik te zeen det veur allemaol flink ware teleurgesjteld en waerde van alle kante sjpontaan gesjteund en op gefleurd.

Oppe mert waas ut moment aangebraoke det de oetsjlaag bekend waerde gemaak en veur hadde gaar neet verwach det veur in de prieze zouwe valle maar toch haolde veur de twieëde Pries in de optoch en det deej os good en waas ein geweldige prestatie. De ierste Pries ging nao PiGeJoHeKa, jónges proficiat.

Det waas ut den, nao de optoch waerde der efkes lekker gegaete en dao nao rap nao de Paerssjtal om der toch nog ein geweldig fiës van te make. Same met Sjpass hóbbe veur dao gefiës toet sjloetes. Veur wille den aug idderein hiel erg bedanke die os hóbbe gehaolpe op wat veur manier den aug danke, danke, danke.

Alaaf.  

P.s. foto’s van de bouw zien te bekieke op de foto pagina.

Reuverse reveu “Veur pakke de draod weer op” 

Zaoterdigaovend 4 november om zeve oeër s’aoves zoot ich fris gewasse en gesjaore, nao unne lange bouwdaag, same met mien vruike  in de Sjakel te wachte op wat der komme zouw. Eigelik ken ich der hiel kort euver zien went ut waas van ut begin toet ut einde geweldig. Gelache, ontroerd maar aug zeker aangenaam verras euver de talente die dao heur beste beinke veur zatte. Neet om emes te kort te doon maar Coen met ziene brommer en Geert in zien trainingspak zalle bie mich nag lang blieve hange. Veur idderein get en ut samesjpel met de filmkes waas ech sjiek.  Zellufs de paus höb ich nag veurbie zeen flitse. Hilarisch. Eigelik gek det de Ruiverse Reveu zoelang weg is geweas. Ze höbbe de draod weer opgepak en det höbbe ze good gedaon. Ich höb genaote en haop det dit weer un jaorliks truukkierend spektakel wurd.

Veur diegene die nag gaon kieke, hiel erg vuul plezeer en alle miense van de Ruiverse Reveu, bedank veur dea sjoeëne aovend. 

Michel                 

Un paar foto´s om uch un korte inpressie te geave van Pascal Gommans
 zien ieërste optreije 5 augustus bie Harrie as
 “Andreas Weiss”.

 Sjoeën gedaon jong.

 Finale wintercompetitie Sjötterie Sint Barbara Reuver. 

Nao de drie mieër as gezellige veurrondes waas os sjöttersteam, Henk ,Marcel en Michel der toch nag in gesjlaag zich te plaatse in de finale. Nao intensieve training en twieje weake wurtelkes eate (volges gelierde zou det good zien veur de auge) waas ut den zoewiet.

Bie aankoms in ut sjötterslokaal aan de Polderweag heufde veur nag neet mieër te zegge wat veur wolle drinke, det wiste ze al. “Phoe phoe as det maar good geit”, dach ich nag. Al gauw hadde alle batse un barkruk gevonje en probeerde ut team de zenuwe get weg te drinke. Helaas höbbe veur dink ich neet allein de zenuwe weggedronke maar aug alles wat se maar enigsinds nuuëdig heas om raak te sjete. Rondj un oeër of tieën ware veur aan de beurt en zoë wie ut unne echte Keuning betaamd knalde Marcel de ieërste prupkes van de herk. Klasse jong!!! De twieëde sjötter, en gluif mich maar went det waas ich zellef, dea zoog al gen prupkes mieër en dea derde, Henk de sjerpsjötter, is volges mich noe nag aan ut kieke wat der allemaol gebeurde. Det waas den veur os de finale, FINAAL DER NEAVE , maar wat waas ut weer gezellig!!!!!!!!!

Al met al un gesjlaagde wintercompetitie van de Sjötterie en zeker unne aanraojer veur idderein dea van gezelligheid held en ens get angers wult. 

Och ja wea had der aug alweer gewonne??
Alle trotse beakerwinnaars van herte en as ut aan mich lik zien veur der ut volgend jaor weer bie.

Michel Smeets

Veur verwieze uch gaer door nao de website van
Schutterij Sint Barbara Reuver veur miër info.

Op maondig 27 fibberwarie om 14.00 oer trok vanoet hertje Óffebék de Groeëte optoch door ut Windjbuujelriëk. Nao maonde veurbereiding kôste veur eindelik mét ós creatie nao boete. De vriedig veuraaf nao ut geneete van ein verukkelik maal in de bouwloods dét aan ós waerde aangebaoje door Bert en Hilde van "Café De Grens" höbbe veur nog toet ein oer of 10 door geknómmeld en zien dao nao gezellig nao ut Wagebouwerstreffe biej "De Paerssjtal" gegaon. Op oetneüdiging van SJPASS en PiGePeJoHeKa om dao lekker gezellig ein pilske te pakke, nou gezellig dét waas ut waal en wat waerde d'r gesjpraoke en gesjwets toet in de kleine uurkes en dét waas veur sommige van ós s'morges nog te merke. Zaoterdig waerde de puntjes op de i gezatte en bouwde veur ózze wage boete op om maondig röstig aan dae drökke daag te beginne. Zonger te oeffene trokke veur nao de opsjtelplaats en dao waerde al gauw dudelik dét veur dao neet door kwame maar veur waerde vakkundig ónger ut trekke van de optoch der tüsse geloods. De zenuwe deeje eur werk en de adraline gierde door ut lief wat waas dét ein gaaf geveul. Veur höbbe d'r van genaote van ut begin toet aan ut eind. De reacties van de toesjouwers waas euverweldigend. Biej ut bekend maake van de oëtsjlaag waerde veur met sjtomheid gesjlage wie Vors Hans Boonen de oëtsjlaag van de praalwages begôs op te laeze. 4e priës nr. 37 "Zorgverzekering lastige keuze" 3e priës nr. 47 "Windjbuujels 55 jaor Drake" 2e priës nr. 42 "De Winnende Vastelaovessjlaeger" en toen..... waas ut sjtil biej ózze groep, Ut zal toch neet hé waerde teage mekaar gezag en dao kwaam ut 1e priës nr. 24 "De Dörpskeuning" wat dao nao gebeurde is neet te besjrieve dao had geur biej môtte zien en wie veur daonao aug nog ens de Windjbuujelcup krege oetgereik barste ut fiës los en dao deej Sjpass nog ein sjöpke baove op om ós te traktere op ein pilske ter iëre van heur 1x11 jaor besjtaon. Jonges bedank veur höbbe genaote. Vanaaf dét moment höbbe veur allein maar gefiës toet in de kleine uurkes. Veur wille den aug allemaol ós sjponsers bedanke en met name Huub Teeuwen dae ut veur ós meugelik haet gemaak om zo'nne wage te kenne bouwe. Huub bedank veur de bouwplaats. Alle Tufkes, miense van Ruiver en Óffebék bedank veur dae sjoëne onvergaetelike Vastelaovend. 

Op 18 fibberwarie höbbe veur deil genaome aan de Drake-Leech-Optoch in Beesel. Met ós Tufke woë veur in 2005 de 2e priës met haolde in de groeëte optoch in ut Windjbuujelriëk. Met miër as 240 maeter leegsjlang höbbe veur geprobeerd d'r eine sjprookjes achtige Tuf van te make, maar dae Tuf allein waas ós veur Beesel neet good genog. Ózze engeneer Michel haet met zien buig en las-mesjiën eine sjitterende draak in mekaar gebraoje en dao höbbe veur aug de neüdige maeters leegsjlang aan vas geknómmeld. Ut waas ein groeët fiës in Beesel al waas ut waer neet al te bés zoot de sjtumming d'r good in. Mét dees creatie höbbe veur aardig in de publiciteit gesjtaon. L1 en TV-Limburg had ós Tufke op de aankondiging sjiëk op de achtergrondj sjtaon, aug biej SBS6 kwaame veur in beeld en zellef in ós lokale drökwerk ut Contactblaad en 't Gazetje sjtong ózze Tuf te sjtraole. Nao aafloup höbbe veur um weer fijn nao zien gebaorte plaats "Óffebék" truuk gebrach en aangebaoje aan Harrie van "De Paerssjtal" wao dae ein waek later op ut mertplein biej ut "Tuffehoes" as eyecatcher veur idderein nog ens te bewonjere waas. Wilt geur de Drake-Leech-Optoch in Beesel nog eine kiër bekieke dén kén det biej TVL of biej TVellef. Klik maar ens op de links hiej ónger dén komt geur d'r vanzellef.

Zoaterdaag 21 januari had mennige vastelaovesleefhebber al diek ongersjtreep in ziene agenda. Diegene die nag un keartje hadde kenne bemachtige ware klaor veur unne sjoeëne aovend joeks en plezeer. De Ieërste sjterzitting in ut jubileumsjaor belaofde un good en vernieuwend programma zoeë-as veur lings en rechs hadde kenne leaze. Jaomer genog waas ut geweun neet wat veur verwach hadde.

De finale wao al zoevuul euver gezag en gesjreve is waas verniejend maar neet wao de vastelaovesvierder op zoot te wachte. Helaas wuuërt den aug al det leuks wat der te zeen waas (en det waas der absoluut) vergeate. Ut Ruivers keteerke, die operazengers, de buuts, en vergeat veural neet de dorsvleagels die al veur de ellefde kieër veur sjtumming zorgde. Jammer det net det letste sjtukske neet ut daak draaf bloos en dao zal ongetwiefeld ongekend vuul energie en tied ingesjtaoke zien. Al met al teleursjtellend maar toch eave good unne sjoeëne aovend.